खड्डे शोधण्यासाठी पुणे महानगरपालिकेचा Ather Energy सोबत सामंजस्य करार: २४ हजार स्कूटर्सकडून मिळणार रस्त्यांची माहिती

महापालिका आयुक्त नवल किशोर राम सामंजस्य करारावर स्वाक्षरी करताना. फोटो: पुणे महानगरपालिका

स्कूटर्स चालवतानाच रस्त्यांची माहिती

Ather च्या माहितीनुसार पुणे शहरात २४,००० पेक्षा अधिक Ather स्कूटर्स रोज धावतात. या connected स्कूटर्समधील सेन्सर्स नेहमीच्या प्रवासादरम्यान रस्त्यावरील धक्के आणि अडथळे नोंदवतात.

या माहितीच्या आधारे महानगरपालिकेला खड्डे, रस्ते खोदाईची ठिकाणे (road cuts), स्पीड ब्रेकर्स आणि इतर अडथळ्यांची ठिकाणे नकाशावर दाखवणारे Road Health Maps मिळणार आहेत.

दुरुस्तीसाठी कसा उपयोग होणार?

• समस्या असलेले रस्ते आणि ठिकाणे लवकर ओळखणे.
• दुरुस्तीच्या कामांना प्राधान्य देणे.
• नेमक्या ठिकाणी काम करण्याचे नियोजन करणे.
• वारंवार खड्डे पडणाऱ्या ठिकाणांवर लक्ष ठेवणे.

ही माहिती महानगरपालिकेच्या प्रत्यक्ष क्षेत्रीय पाहणीला आणि सध्याच्या रस्ते देखभाल प्रक्रियेला पूरक म्हणून वापरली जाईल. माहिती किती मिळेल हे Ather स्कूटर्स कोणत्या रस्त्यांवरून जातात यावर अवलंबून असेल. आपोआप जमा होणाऱ्या या माहितीच्या पूर्ण अचूकतेची स्वतंत्र हमी Ather ने दिलेली नाही, त्यामुळे प्रत्यक्ष पाहणी करूनच काम केले जाईल.

नागरिकांची वैयक्तिक माहिती दिली जाणार नाही

या व्यवस्थेत नागरिकांची किंवा Ather ग्राहकांची कोणतीही वैयक्तिक माहिती महानगरपालिकेला दिली जाणार नाही. महानगरपालिकेला फक्त ठिकाणांवर आधारित एकत्रित (aggregated) माहिती मिळेल.

हा करार एक वर्षासाठी आहे. या काळात connected वाहनांच्या माहितीचा शहरातील रस्ते व्यवस्थापन आणि पायाभूत सुविधांच्या नियोजनासाठी कसा उपयोग करता येईल, हे तपासले जाईल.

आयुक्त नवल किशोर राम काय म्हणाले?

"रस्त्यांवरील त्रुटी वेळेत ओळखणे हे प्रभावी रस्ते देखभाल आणि प्रवाशांच्या सुरक्षिततेसाठी महत्त्वाचे आहे. तंत्रज्ञानाधारित माहिती आणि प्रत्यक्ष क्षेत्रीय पाहणी यांची सांगड घालून पुण्यातील रस्ते व्यवस्थापन अधिक डेटा-आधारित व परिणामकारक करण्याचा महानगरपालिकेचा प्रयत्न आहे," असे महापालिका आयुक्त नवल किशोर राम यांनी सांगितले.

उपस्थित मान्यवर

या वेळी महापालिका आयुक्त नवल किशोर राम, अतिरिक्त महापालिका आयुक्त (इस्टेट) प्रजित नायर, शहर अभियंता अनिरुद्ध पावसकर आणि माहिती तंत्रज्ञान विभाग प्रमुख राहुल जगताप उपस्थित होते. Ather च्या वतीने मिलिंद कोठेकर (Head of Product and Chief of Staff), डॉ. सुरेंदर सिंग्रोहा (Corporate, Legal and Public Policy), ऋषिकेश प्रधान (Senior Product Manager) आणि अमोल मोहिते (Government Relations and Policy) उपस्थित होते.